Fréttir

Langar þig í MS? Innritun nemenda úr 10. bekk stendur yfir frá 25. apríl til 10. júní. Sótt er um í gegnum innritun.is

Umhverfisvika fór fram í MS dagana 20.-22. apríl. Vikan var skipulögð af umhverfisnefnd skólans en í henni sitja nemendur í Grænfánaáfanga sem Kristbjörg Árnadóttir umhverfisfræðikennari hefur umsjón með. Í áfanganum kynnast nemendur umhverfisstjórnunarkerfi sem verkefnið Skólar á grænni græn byggir á og beita áhrifum sínum í átt að aukinni sjálfbærni innan skólans og nærsamfélagsins. Áfanginn er kenndur yfir allt skólaárið og þar fara nemendur í gegnum þau skref sem til þarf til að fá Grænfánann. Vinnan nær hámarki sínu í umhverfisviku að vori þar sem nemendur standa fyrir viðburðum tengdum umhverfismálum og með Grænfánaafhendingu. 

Laugardaginn 11. apríl verður Söngkeppni framhaldsskólanna 2026 haldin með pompi og prakt í Háskólabíó. Keppnin verður líka sýnd í beinni á RÚV og hefst útsendingin kl. 20:45. Fulltrúi MS í keppninni er Maja Margrét Tosik-Warszawiak sem flytur lagið I Have Nothing. Áhorfendur geta kosið keppendur og við hvetjum öll til að kjósa okkar konu í síma 9009111. Við óskum Maju góðs gengis og áfram MS!

Skrifstofa skólans verður lokuð vegna páskafrís 30. mars til 6. apríl. Kennsla hefst aftur samkvæmt stundaskrá þriðjudaginn 7. apríl.

Kennsla fellur niður í MS í dag vegna veðurs. Nemendur fylgist með frekari fyrirmælum frá kennurum á Innu.

Veðurspá er slæm fyrir morgundaginn fimmtudaginn 26. mars. Ef skólahald verður fellt niður berast nemendum og foreldrum upplýsingar um það eigi síðar en kl. 7:00 í fyrramálið. Ef ekki hefur orðið af óveðri eða ófærð verður skólahald óbreytt. Ef veðurspá eða ófærð gengur eftir færist skólahald yfir á Innu. Hver kennari ákveður hvernig tími nemenda nýtist sem best í hverjum áfanga fyrir sig. Nemendur bera ábyrgð á að fylgjast með á Innu. Nemendur sem búa utan höfuðborgarsvæðisins skulu fylgjast vel með fréttum og ekki vera á ferðinni þegar veðurviðvörun er í gangi.

Hér má sjá dagskrá matsdaga 24. og 25. mars. Nemendur bera ábyrgð á því að vera í samskiptum við kennara og mæta í sín próf/verkefni á réttum stað og stund.

Í apríl verða haldnar kynningar fyrir nemendur í 10. bekk á námsframboði og skipulag námsins í MS. Að auki segja nemendur úr stjórn SMS frá félagslífinu. Kynningarnar verða haldnar á eftirfarandi dagsetningum: Fimmtudagur 9. apríl kl. 15-16 Mánudagur 13. apríl kl. 15-16 Skráning er nauðsynleg og takmarkað sætapláss á hverri kynningu. Því miður getum við ekki tekið á móti forsjárfólki á þessar kynningar en þann 18. mars kl. 15-17 verður opið hús í MS fyrir gesti og gangandi þar sem öll eru velkomin.

Leikfélagið Thalía sýndi á dögunum söngleikinn Fútlús í Hlégarði og fóru nemendur á kostum í sýningunni undir leikstjórn Ásgríms Geirs Logasonar. Sýningin einkenndist af miklum krafti og skein leik-, söng- og dansgleðin í gegn frá upphafi til enda. Áhorfendur tóku sýningunni gríðarlega vel og uppselt var á allar sýningar, sem er glæsilegur vitnisburður um áhuga og stuðning við leiklistarstarf MS-inga. Skólinn óskar öllum sem komu að sýningunni innilega til hamingju með frábæran árangur!

Menntaskólinn við Sund og upplýsingatæknifyrirtækið APRÓ hafa gert með sér samning um víðtækt þróunarsamstarf á sviði gervigreindar. Samstarfið lýtur að innleiðingu á APRÓ Vitanum, öruggu gervigreindarumhverfi fyrir nemendur og starfsfólk, og ráðgjöf og stefnumótun fyrir þróun kennslu og náms í gervigreind. MS nýtir gervigreind til að styðja kennara í daglegu starfi og hyggst gera það í enn frekari mæli. Meðal annars við undirbúning kennslu, verkefnagerð, endurgjöf og til að einfalda skjalavinnu og upplýsingamiðlun innan skólans. Með innleiðingu og notkun APRÓ Vitans öðlast MS fullt eignarhald á gögnum og þeim gervigreindarlausnum sem þar verða þróaðar.