LÍFF2EF05 - Erfðafræði

Í þessum áfanga eru grundvallaratriði erfðafræðinnar skoðuð. Viðfangsefni áfangans eru frumuskiptingar, stofnfrumur og frumusérhæfing, gen og litningar, litningabreytingar, lögmál Mendels og ýmis arfmynstur, erfðir tengdra og ótengdra gena, gerð kjarnsýra og eftirmyndun DNA, umritun og próteinmyndun, stjórnun genatjáningar, erfðabreytileiki og erfðaauðlindir. Frumuhringurinn er skoðaður, stökkbreytingar í erfðaefni og krabbamein. Einnig er skoðað hvernig umhverfi getur haft áhrif á erfðaefnið (utangenaerfðir). Nokkrar af aðferðum erfðatækninnar eru kynntar og áhugaverð ný þekking eða rannsóknir á t.d. erfðasjúkdómum skoðaðar eins og við á.

Þekkingarviðmið
Nemandi skal hafa öðlast þekkingu og skilning á:

• frumuskiptingum (jafn- og rýriskiptingu)
• stofnfrumum og frumusérhæfingu
• lögmálum Mendels og helstu arfmynstrum
• byggingu DNA, eftirmyndun, umritun, þýðingu og stjórnun genatjáningar
• stökkbreytingum og litningabreytingum
• grundvallaratriðum í erfðatækni og hagnýtingu hennar
• mikilvægi erfðabreytileika sem erfðaauðlindar

Leikniviðmið
Nemandi skal hafa öðlast leikni í að:

• þekkja mismunandi fasa frumuskiptinga
• leysa erfðafræðiverkefni með tengdum og ótengdum genum, með ættartöflum, og með öðrum gögnum sem tengjast námsefninu
• nota íslenskar og erlendar heimildir um ýmis málefni erfðafræðinnar
• útskýra hvernig erfðatækni er notuð í samfélaginu í dag

Hæfniviðmið
Nemandi skal geta hagnýtt þá almennu þekkingu og leikni sem hann hefur aflað sér til að:

• greina, meta og nýta upplýsingar um erfðafræði
• vinna sjálfstætt að úrlausn verkefna og miðla niðurstöðum sínum á skýran hátt
• afla sér frekari þekkingar í erfðafræði
• geta tekið þátt í umræðum tengdum erfðafræði og tekið upplýsta afstöðu til siðferðilegra álitamála