Gervigreind og samfélag

Áfanginn fjallar um gervigreind, nánar tiltekið spunagreind, hvernig hún virkar og áhrif hennar á samfélagið í heild, með sérstaka áherslu á bæði nám og atvinnulíf. Nemendur læra að nota gervigreind með ábyrgum hætti, beita gagnrýnni hugsun við upplýsingaleit og nýta gervigreindarverkfæri á fjölbreyttan máta. Einnig verður fjallað um siðferðileg álitamál tengd gervigreind. Lögð er áhersla á hagnýta notkun, skapandi verkefni og umræðutíma.

Þekkingarviðmið
Nemandi skal hafa öðlast þekkingu og skilning á:

• Gervigreind, sögu hennar og hvernig hún virkar.
• Siðferðilegum álitamálum tengdum gervigreind.
• Hvernig gervigreind er notuð í mismunandi atvinnugreinum.
• Áhrifum gervigreindar á samfélagið okkar.

Leikniviðmið
Nemandi skal hafa öðlast leikni í að:

• Nota mismunandi gervigreindarverkfæri á skilvirkan og ábyrgan hátt.
• Greina og meta áreiðanleika upplýsinga sem gervigreind veitir.
• Skrifa markviss fyrirmæli (e. prompts) til að nýta kosti gervigreindar eins vel og auðið er.
• Nota gervigreind á skynsaman hátt til að bæta eigin afköst.

Hæfniviðmið
Nemandi skal geta hagnýtt þá almennu þekkingu og leikni sem hann hefur aflað sér til að:

• Nota gervigreind með gagnrýnni hugsun í námi og starfi.
• Skilja bæði kosti og áskoranir sem gervigreind hefur í för með sér.
• Taka þátt í umræðum um framtíð gervigreindar og samfélagsleg áhrif hennar.
• Geta metið siðferðileg álitamál og sett þau í samhengi við eigin ábyrgð.
• Gera grein fyrir samspili þekkingar, siðferðis og ábyrgðar.
• Geta beitt öguðum vinnubrögðum, tekið ábyrgð á eigin námi og unnið í samvinnu við aðra.

Gerð er grein fyrir námsmati og sundurliðun þess í námsáætlun.

Undanfari: Enginn