MYND1ML05 - Myndlist grunnáfangi

Í áfanganum læra nemendur tæknileg undirstöðuatriði og helstu vinnuaðferðir tengdar myndlist, s.s. formfræði, litafræði, hlutföll, fjarvídd, myndbyggingu, teikningu og málun. Lögð er áhersla á að þjálfa hæfni nemenda og tækniþekkingu og skapandi hugsun til að koma hugmyndum sínum á framfæri. Nemendur byrja á að búa til ferilbók og nýta hana alla lotuna til að skrá niður hugmyndir að verkum auk þess sem þeir þjálfa sig í að teikna viðfangsefni í nærumhverfi. Lögð er áhersla á tengingu við listina í landinu með heimsókn á listasöfn og mögulega vinnustofu þar sem boðið er upp á leiðsögn. Auk þess eru nemendur hvattir til að sækja listsýningar á eigin vegum. Nemendur útbúa kynningu á íslenskum myndlistarmanni og flytja fyrir samnemendur sína.

Þekkingarviðmið
Nemandi skal hafa öðlast þekkingu og skilning á:

• helstu stefnum, viðfangsefnum og vinnuaðferðum myndlistar
• mikilvægustu hugtökum og orðaforða greinarinnar
• formum, litum og öðrum tæknilegum undirstöðuatriðum í listum
• þróun eigin hugmynda
• verkum nokkurra íslenskra myndlistamanna

Leikniviðmið
Nemandi skal hafa öðlast leikni í að:

• nýta sér grunnþjálfun í meðferð tækja, efna og verklagi til listsköpunar
• þróa eigin hugmyndir yfir í verk
• nálgast upplýsingar um myndlist, ræða og meta
• ræða um og meta eigin verk

Hæfniviðmið
Nemandi skal geta hagnýtt þá almennu þekkingu og leikni sem hann hefur aflað sér til að:

• nýta sér þá færni sem hann hefur tileinkað sér til að koma á framfæri eigin hugmyndum og vinna með mismunandi aðferðir til listsköpunar
• útskýra vinnu og ferli frá hugmynd til fullgerðs verks
• sýna frumkvæði, skapandi nálgun og sjálfstæði í verkum sínum

Gerð er grein fyrir námsmati og sundurliðun þess í námsáætlun.

Undanfari: Enginn