Málabraut

Markmið málabrautar er að mennta nemendur í hugvísindum. Með hugvísindum er átt við: mál, menningu, miðlun. Viðfangsefni málabrautar eru að veita aðgang að menningararfi Íslands og Evrópu — sumpart á frummálinu, gera nemendur færa um að miðla vitneskju sinni á áhrifaríkan hátt til annarra og mynda tengsl milli Íslendinga og Evrópubúa.

Nám á málabraut undirbýr nemendur sérstaklega undir háskólanám í hugvísindum, tungumálum, bókmenntum og listum en einnig undir störf í almannatengslum, blaðamennsku og ferðamennsku. Í fjölþjóðlegu umhverfi nútímans er nám á málabraut gott veganesti. Kunnátta í tungumálum Evrópu og innsýn í menningu og menningararf álfunnar er meginforsenda þess að eiga farsæl samskipti við þær þjóðir sem standa okkur næst. Vald á móðurmálinu og innsýn í áhrif málbeitingar eru forsendur velgengi í heimi þar sem tjáskipti eru öllum öðrum áhrifavöldum ofar.

Íslenska er stærsta námsgreinin á málabraut en enska og þriðja mál (þýska eða franska) hafa næstum því jafn marga tíma. Það á líka við um sögu, en helmingur sögunámsins er nám í menningu, hugmynda- og listasögu Evrópu. Evrópsk bókmenntaverk eru kynnt í þýðingu. Lögð er áhersla á að nemendur verði virkir og meðvitaðir málnotendur og auk þess virkir þátttakendur í menningarlífi líðandi stundar. Danska og fjórða tungumálið (þýska, franska, spænska) eiga einnig stóran sess í náminu en nám í samfélagsgreinum, náttúrufræðum og stærðfræði er skorið við nögl.

KJARNI MÁLABRAUTAR

Á málabraut taka kjörsviðin upp frekar fáa tíma. Munurinn á milli latínukjörsviðs og hugvísindakjörsviðs eru aðeins alls 9 einingar í 3. og 4. bekk. Hins vegar hafa nemendur líka valfrelsi um þriðja og fjórða tungumál. Við upphaf 1. bekkjar velja nemendur þriðja erlenda málið, annaðhvort frönsku eða þýsku. Við upphaf 2. bekkjar skiptist hópurinn aftur: Þeir sem hafa valið frönsku í 1. bekk, geta valið annaðhvort þýsku eða spænsku sem fjórða erlenda málið. Þeir sem hafa valið þýsku í 1. bekk, geta valið annaðhvort frönsku eða spænsku sem fjórða erlenda málið.

Í íslensku er lögð aukin áhersla á sjálfstæð vinnubrögð við öflun og úrvinnslu efnis um málfræði og málvísindi auk þess sem farið er yfir helstu þætti hugtaka og heita í bókmenntafræði. Ítarlegri umfjöllun er um bókmenntir 20. aldarinnar en á öðrum brautum.

Í ensku er nokkuð jöfn áhersla á tungumálið annars vegar og bókmenntir hinsvegar. Auknar áherslur eru á lesskilning og ritun eftir því sem ofar dregur í aldri. Lesnar eru skáldsögur, smásögur, leikrit og ljóð og helstu hugtök bókmenntarýni eru sérstaklega tekin fyrir.

Í frönsku, þýsku og spænsku er megininntak námsins þjálfun í hlustun, tali, lestri og ritun. Eftir því sem lengra er haldið í náminu, er unnið meira með bókmenntatexta og umfjöllun um menningu þjóðanna og menningastrauma þaðan.

Í dönsku á málabraut eru 9 einingar en ekki 6. Þar er unnið með kynni af dönsku þjóðfélagi og lesnar skáldsögur.

Í 2. bekk er í sameiginlegum kjarna, auk venjulegrar sögu, kennd menningarsaga: grísk-rómversk menning fornaldar, endurreisn á Ítalíu, rómantiska stefnan í Evrópu og síðan raunsæisstefnan. 

Í 4. bekk vinna nemendur beggja kjörsviða kjörsviðsverkefni í íslensku, ensku eða menningarsögu.

Sjá einnig glærur með kynningu á kjörsviðum málabrautar hér að neðan:
PowerPoint skjal, 187 kB
Sækja...